11 septembre 2011

أول إجتماع للمجلس التأسيسي

إنعقد يوم 25 أكتوبر أول إجتماع للمجلس التأسيسي والهدف متاعوا إقتراح حكومة لتعويض حكومة السبسي. إفتتح السيد حمادي المستيري والانسة أمل نصر، وامال المثلوثي الجلسة بإعتبارهم أكبر وأصغر عضوين في المجلس بقراءة الفاتحة على شهداء تونس الابرار. بعد ذلك قام السيد أحمد نجيب الشابي والسيدة مايا الجريبي بتوزيع كسكروتات غوتة وجبن وشامية للحاضرين الكل إلا جماعة النهضة نظراً للعلاقات المتوترة بين الطرفين. تناول جميع الحاضرين إلا جماعة أفاق باستثناء سي لطفي السايبي و جماعة المرزوقي وحمة. أفاق تعللو بالظروف الصحية لتحضير الكسكروتات. المرزوقي قال إنو الكسكروتات نوع من أنواع الرشوة السياسية و انو إلي حضرها كن صباب لل بوليس السياسي. حمة الهمامي قال إنو الغوتة أكلة بورجوازية وانو راضية النصراوي جابت معاها سطيل حوار. جماعة النهضة منبوزين قام رجل أعمال رفض الافصاح عن هويتو بلفريزون من عند فخرالدين للجماعة الكل إلا الشابي. بداو الجماعة يكلوا و فوجئوا بجمعية التجديد خرجوا كعبات بيرة مل فاليز ديبلوماتيك.

حمة الهمامي: يا سي أحمد، كان عندك سلتية هات أما باكس لا
أحمد براهيم: هاهو عندي دبوسة كودية فلقلاسيار متاع جنيدي، خوذها
ديلو : يا جماعة يهديكم مش معقول هكا
مورو : يا سمير ريض عيش ولدي خلي الشعب يعيش. متشربش إنت وشيهمك. يا سيدي أحمد، كان ثمة وحيدة سان الكول ال عمك
ديلو : يا سي عبدالفتاح، توا كلمني سي راشد وقال كان جماعة جبت شراب هزو رواحكم واخرجوا
سليم رياحي : كلمة توا مارك دبوزي معادش تستعملها ولا نشكي بيكم

سمعوا الجماعة برشة حس, تلفتوا يلقاو فوزي البنزرتي و سليم رياحي وصابر بن فرج ونجيب الشابي عاملين طاولة بوكار وسط تصفير منصف بن سالم والحبيب اللوز. فوزي البنزرتي حط مليون عل طاولة وقال شكون يخاطر، حمة ما يكملش دبوزة الكودية.
هوما هكة وقامت عركة مابين صابر بن فرج وياسين بوشعالة. صابر طيش شقف سلتية على ياسين ولحمت بين فوزي وصابر وشكري الواعر وسليم رياحي من جهة وياسين بوشعالة وصلاح الدين الزحاف ومهدي الرباعي من جهة أخرى. ضرب كراسي وشقوفة ... هذا الكل على أنغام كلمتي حرة ... عيط يوسف صديق إجريولي : شكري الواعر طايح على أرضية الميدان - المجلس - وجبينو بالدم. قرر وقتها سي أحمد المستيري الجلسة في إنتظار مرسوم من هيئة بن عاشور يمنع المأكولات والمشروبات الكحولية من المجلس التأسيسي


فوزي البنزرتي : يا سليم كانك هبت سنتر فيل حطني في البارك. الكرهبة من غير عجلات ملي بدات الحرب في ليبيا
سليم رياحي : باهي أما تجي معنا توا للحزب الوطني الحر
فوزي البنزرتي : باهي
امال المثلوثي: حطوني في دار الثقافة إبن رشيق في ثنيتكم


1 commentaire:

  1. بصراحة بليدة منك يا دالي !!! ، اما وينو لملوم ؟ و ياسين العياري ؟؟؟

    RépondreSupprimer