25 mars 2012

أنا الجريح عندي شهور من الألم نعاني, نسيتني

أنا إلي في الإنتخابات تاجرت بدمي و قضيتي 
و بعد ما انتخبوك الناس حقرتني و نسيتني
جيتك للقصبة ياخي بالمتراك ضربتني وذليتني 
و في حقي في العلاج والتعويض كليتني 
ماطلتني همشتني و جبتني ومشيتني

حرام عليك دموع أمي على خذها سالت 
عينها من البكاء حوقت ووجهها أصفر باهت 
خايفة على وليدها وحتى من ذهبها باعت 
كبدتها يتعذب و على الألم صابر و ساكت 
يقوللها متخافيش يا ميمتي الغالية هانت
كوني فخورة بولدك و خلي ايمانك بالله ثابت 

يا ديلو، يا غنوشي، يا مرزوقي ويا جبالي 
أنا إلي رجعتلك حريتك وخليتك في العلالي 
أنا إلي لقيت صدري للكرتوش من أجل بلادي
أنا الجريح عندي شهور وأنا من الألم نعاني 
جرحي تقيح وخايف لا ساقي يقصوهالي

قلنا بن علي هرب ومعاه التجمع والطرابلسية
والبلاد لأولادها رجعت وحكومتها شرعية
و شعارها تشغيل حرية و عدالة إجتماعية 
طلعت وعود وآمال كاذبة والحكاية هي هي 
حتى حمد و موزة جبتوهم يعملوا علينا مزية
وعدنا بصندوق علاج  وماجاتنا المنحة القطرية     
و يا تجمع صحة خرجت عليك اللحية النهضاوية


2 commentaires:

  1. و الله شي مؤسف عباد لاهيتلي بالشّريعة و العلم آك الرّيق متاع النّقاب خرم فارغ

    RépondreSupprimer
  2. Merci pour le poème, mais svp ceci est le logo d'une association et il faut demander sa permission avant d'associer son logo à votre poème.

    RépondreSupprimer